Sunday, August 1

भरतपुर महानगरले १३ हजार बढी सुकुम्बासीलाई जग्गाधनी पूर्जा उपलब्ध गराउने प्रक्रिया अघि बढायो

March 18, 2021 152

चितवन, ५ चैत । भरतपुर महानगरपालिकाले भूमिहीन तथा सुकुम्बासीलाई जग्गाधनी पूर्जा उपलब्ध गराउने प्रक्रिया अघि बढाएको छ ।

महानगरपालिकाले १३ हजारभन्दा बढी सुकुम्बासीलाई जग्गाधनी पूर्जा दिने गरी प्रक्रिया अघि बढाएको महानगरपालिकाकी मेयर रेणु दाहालले जानकारी दिइन् ।

मेयर दाहालका अनुसार यतिबेला सुकुम्बासीले दिएको निबेदनको आधारमा फारम भर्ने काम भइरहेको छ । महानगरपालिकाको भुमी सम्बन्धी समस्या समाधान आयोग ईकाईका प्रमुख अमोद सुबेदीका अनुसार ९ हजार हाराहारीमा फारम भरिसकिएको छ ।

ईकाइ प्रमुख सुबेदीका अनुसार भूमिहीन तथा सुकुम्बासीको डाटा लिएर प्रमाणित गरी भूमिहीन सुकुम्बासी समस्या समाधान आयोगमा सिफारिस गर्ने तयारी समेत भइरहेको छ ।

जस्को लागि वडाले सार्वजनिक सुनवाई गरेर छानबिन गरे पश्चात आयोगमा पठाइन्छ । प्रत्येक वडाले सुकुम्बासीले दिएको निबेदनको आधारमा फारम भरेको प्रति छानबिन गरी ठीक छ या छैन भन्ने एकिन गर्नेछन् ।

त्यसपछि भूमिहीन तथा सुकुम्बासीको डाटा लिएर प्रमाणित गरी भूमिहीन सुकुम्बासी समस्या समाधान आयोगमा सिफारिस गरिन्छ । सुकुम्बासीलाई निःशुल्क जग्गा छ कठ्ठासम्म र शुल्क तिरेर एक बिघा नौ कठ्ठासम्म उपलब्ध गराउने व्यवस्था गरिएको छ ।

महानगरपालिका सहित चितवनका सबै स्थानीय तहले ६ महिनाभित्रै भूमिहीनलाई पूर्जा वितरण गर्ने तयारी गरेका छन् । चितवनमा ३७ हजार जनालाई पूर्जा बितरण गर्ने काम भईरहेको आयोगका जिल्ला अध्यक्ष यादब पाठकले जानकारी दिए ।

प्रतिकृया दिनुहोस्